अछामको ढकारी गाउँपालिकामा चलचित्र निर्माणका नाममा बजेट दुरुपयोग गरेको आरोपमा गाउँपालिका अध्यक्षसहित चार जनाविरुद्ध विशेष अदालतमा भ्रष्टाचार मुद्दा दायर गरिएको छ।

अख्तियार दुरुपयोग अनुसन्धान आयोगका अनुसार गाउँपालिकाले अभिनेता राजेश हमालको निर्देशनमा ‘अन्धपथ’ नामक चलचित्र निर्माण गर्ने भन्दै नियमविपरीत १५ लाख रुपैयाँको सम्झौता गरेको थियो। त्यसपछि करिब १२ लाख ७५ हजार रुपैयाँ भुक्तानी गरिएको उल्लेख छ।

यस प्रकरणमा गाउँपालिका अध्यक्ष प्रकाशबहादुर साउद, तत्कालीन निमित्त प्रमुख प्रशासकीय अधिकृत लक्ष्मण शाह र लेखापाल विमल साउदविरुद्ध मुद्दा दायर गरिएको छ। चलचित्र निर्माणको जिम्मा पाएको आरजे ट्वान्टी फोर न्यूज तथा नव इन्द्रेणी फाउण्डेशन काठमाडौंका अध्यक्ष रामजी लम्साल (रामबहादुर लम्साल)लाई पनि प्रतिवादी बनाइएको छ।

चारै जनाविरुद्ध जनही १२ लाख ७७ हजार २५० रुपैयाँ बिगो मागदाबी गरिएको छ।

अभियोगपत्रअनुसार २० प्रतिशतसम्म मात्र पेस्की दिन मिल्ने कानुनी व्यवस्था हुँदाहुँदै गाउँपालिकाले ५८ प्रतिशतसम्म पेस्की दिएको छ। साथै, चलचित्र निर्माणका लागि घर भाडा र अन्य खर्चका नाममा नक्कली तथा झुट्टा बिल पेस गरी भुक्तानी लिएको आरोप पनि लगाइएको छ।

त्यस्तै, हिउँदे अधिवेशनबाट कार्यक्रम संशोधन र रकमान्तर गरी सेटिङमा हिनामिना गरिएको अभियोगपत्रमा उल्लेख गरिएको छ।