इजरायलका प्रधानमन्त्री बेन्जामिन नेतान्याहुले मार्च १९, २०२६ मा जेरुसेलममा विदेशी सञ्चारमाध्यमका लागि पत्रकार सम्मेलन गरेका छन्। यो सम्मेलन अमेरिका–इजरायल र इरानबीच सुरु भएको युद्धपछि उनको दोस्रो र अंग्रेजी भाषामा गरिएको पहिलो पत्रकार सम्मेलन हो।
अमेरिका–इजरायल र इरानबीच जारी द्वन्द्वका बीच इजरायलका प्रधानमन्त्री बेन्जामिन नेतान्याहुले २०२६ मार्च १९, बिहीबार, जेरुसेलममा आयोजित पत्रकार सम्मेलनमा सम्बोधन गर्दै।
यो युद्ध फेब्रुअरी २८, २०२६ मा इरानको आणविक कार्यक्रमबारे कूटनीतिक प्रयास असफल भएपछि सुरु भएको हो। मार्च १९ सम्म आइपुग्दा युद्ध २० दिन पुगेको छ।
यस अवधिमा अमेरिका र इजरायलले संयुक्त रूपमा इरानका आणविक केन्द्र, ब्यालिस्टिक मिसाइल संरचना, उत्पादन कारखाना, हवाई सुरक्षा प्रणाली, नौसेना, वायुसेना र कमाण्ड संरचनामा आक्रमण गरेका छन्।
इरानले यसको जवाफमा सयौँ ब्यालिस्टिक मिसाइल प्रहार गरेको छ। इजरायली सेनाका अनुसार ३६५ मिसाइल प्रहार गरिएका थिए, जसमध्ये ९० प्रतिशतभन्दा बढी अवरुद्ध गरिएको छ। साथै ड्रोन आक्रमण र गल्फ क्षेत्रका ऊर्जा केन्द्र तथा होर्मुज जलडमरु अवरुद्ध गर्ने प्रयास पनि गरिएको छ।
साउथ पार्स आक्रमणपछि थप तनाव
पत्रकार सम्मेलनको एक दिनअघि, मार्च १८ मा, इजरायलले इरानको साउथ पार्स/असलुयेह ग्यास क्षेत्रमा आक्रमण गरेको थियो। यो विश्वकै ठूलो प्राकृतिक ग्यास क्षेत्र हो।
यस आक्रमणपछि ऊर्जा क्षेत्रमा प्रतिआक्रमण बढेको छ र विश्व बजारमा तेल तथा ग्यासको मूल्य बढेको छ। नेतान्याहुले उक्त आक्रमण इजरायलले एक्लै गरेको दाबी गरेका छन्, यद्यपि अमेरिका यसबारे जानकारीमा रहेको बताइएको छ। अमेरिकी राष्ट्रपति डोनाल्ड ट्रम्पले यस्ता आक्रमण रोक्न आग्रह गरेको पनि जनाइएको छ।
पत्रकार सम्मेलन
नेतान्याहुले पत्रकार सम्मेलनमा सुरुमा आफू जीवित रहेको भन्दै फैलिएको हल्लाको खण्डन गरेका थिए। उनले भने, “म जीवित छु, तपाईंहरू सबै यसको साक्षी हुनुहुन्छ।”
त्यसपछि उनले ‘अपरेसन रोअरिङ लायन’ बारे जानकारी दिएका थिए।
उनका अनुसार अमेरिका र इजरायल राष्ट्रपति ट्रम्पको नेतृत्वमा “अभूतपूर्व शक्ति र दृढताका साथ” संयुक्त रूपमा अघि बढिरहेका छन्।
यस सैन्य अभियानका तीन मुख्य उद्देश्य उनले यसरी प्रस्तुत गरे:
इरानको आणविक खतरा हटाउने
ब्यालिस्टिक मिसाइलको खतरा समाप्त गर्ने
इरानी जनतालाई स्वतन्त्रता प्राप्त गर्ने वातावरण तयार गर्ने
इरानमाथि कडा आरोप
नेतान्याहुले इरानको शासनलाई ४७ वर्षदेखि चलिरहेको “मृत्यु संस्कार” भएको व्यवस्था भन्दै अमेरिका, इजरायल र मध्यपूर्वमाथि आक्रमण गर्दै आएको आरोप लगाए।
उनले भने, यदि यो रोकिएन भने इरानले आणविक मिसाइलमार्फत विश्वलाई धम्की दिने र होर्मुज जलडमरु बन्द गरेर विश्व अर्थतन्त्रलाई दबाबमा पार्नेछ।
युद्धको २० दिनपछि उनले आफ्नो हालसम्मको प्रगतिलाई यसरी व्याख्या गरे:
इरानको मिसाइल र ड्रोन क्षमता कमजोर बनाइएको
सयौँ लन्चर नष्ट गरिएको
औद्योगिक संरचना ध्वस्त पारिँदै गएको
हवाई सुरक्षा प्रणाली निष्क्रिय बनाइएको
नौसेना समुद्रमा डुबेको
वायुसेना लगभग नष्ट भएको
कमाण्ड प्रणाली अस्तव्यस्त अवस्थामा पुगेको
उनले केवल हतियार मात्र नभएर ती हतियार बनाउने कारखाना पनि नष्ट गर्ने रणनीति अपनाइएको बताए।
अमेरिका–इजरायल सम्बन्धबारे स्पष्टता
नेतान्याहुले इजरायलले अमेरिकालाई युद्धमा तानेको भन्ने आरोप अस्वीकार गरेका छन्। उनले भने, “के कसैले राष्ट्रपति ट्रम्पलाई के गर्ने भनेर भन्न सक्छ?”
उनका अनुसार ट्रम्पले लामो समयदेखि इरानलाई खतरा मान्दै आएका थिए । उनले विश्वले ट्रम्पप्रति “ऋणी” हुनुपर्ने बताए।
नेतान्याहुले इतिहासकार विल डुरान्टको सन्दर्भ जोड्दै , “यो संसारमा सही र नैतिक हुनु मात्र पर्याप्त हुँदैन।” भन्ने बताएका छ्न । उनले शक्ति र कठोरता नभए “दुष्ट शक्तिले राम्रोमाथि जित हासिल गर्ने” चेतावनी समेत दिए। लोकतन्त्रले न्यायसँगै शक्ति पनि प्रयोग गर्नुपर्ने उनको भनाइ थियो।
उनले यो युद्धपछि मध्यपूर्वमा नयाँ ऊर्जा मार्गहरू खुल्न सक्ने बताए। तेल र ग्यास पाइपलाइन अरब प्रायद्वीप हुँदै इजरायलको भूमध्यसागर बन्दरगाहसम्म पुग्न सक्ने सम्भावना रहेको उनले औंल्याए।
इरानमा शासन परिवर्तनबारे धारणा
प्रश्नोत्तरका क्रममा नेतान्याहुले इरानमा शासन परिवर्तन हुने वा नहुनेबारे अहिले नै भन्न नसकिने बताए।
उनले भने, “यो इरानी जनतामा निर्भर छ, उनीहरूले सही समयमा उठ्नुपर्छ।”
हवाई आक्रमण मात्रले क्रान्ति सम्भव नभएको भन्दै उनले भौतिक (ग्राउन्ड) पक्ष पनि आवश्यक हुने बताए।
उनले रेजा पहलवीलाई सकारात्मक शक्तिका रूपमा उल्लेख गरे, तर कुनै एक नेताको समर्थन नगरेको स्पष्ट पारे।
नेतान्याहुले आफूहरू युद्धमा अगाडि रहेको दाबी गर्दै आलोचना र अफवाहलाई खारेज गरेका छन्। उनले ट्रम्पको नेतृत्वलाई प्रमुख रूपमा प्रशंसा गरेका छन् तर केही अन्तर्राष्ट्रिय निकायहरूले उनका दाबीहरूमाथि प्रश्न उठाएका छन्। अन्तर्राष्ट्रिय आणविक ऊर्जा एजेन्सीका अनुसार इरानको क्षमता पूर्ण रूपमा समाप्त भएको छैन।
हालसम्म युद्धको अन्त्य कहिले हुन्छ भन्ने स्पष्ट छैन। यो युद्ध ऊर्जा पूर्वाधारमा केन्द्रित हुँदै गएको छ र यसको प्रभाव विश्व अर्थतन्त्र र ऊर्जा आपूर्तिमा दीर्घकालीन हुन सक्ने देखिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
