अमेरिकी दक्षिण तथा मध्य एसियाका विशेष दूत सेर्जियो गोर र राष्ट्रिय स्वतन्त्र पार्टी (रास्वपा) का सभापती रवि लामिछानेबीच मङ्गलबार टेलिफोन संवाद भएको छ। अमेरिकी दूतावास, काठमाडौंका अनुसार चैत १० गते भएको सो संवादमा आपसी चासोका विषयमा छलफल भएको हो।
सर्जियो गोर हाल अमेरिकी दूतावास, भारतका राजदूत र दक्षिण तथा मध्य एसियाका लागि अमेरिकी विशेष दूतका रूपमा कार्यरत छन्। उनी सन् २०२५ को अगस्टमा राष्ट्रपति डोनाल्ड जे. ट्रम्पद्वारा दुवै पदका लागि मनोनित भएका थिए ।
गोर अमेरिकी रिपब्लिकन पार्टीसँग लामो समयदेखि जोडिएका राजनीतिज्ञ र व्यवसायी हुन्। उनले आफ्नो करियरको सुरुवात रिपब्लिकन नेशनल कमिटीमा, प्रतिनिधि मिचेल बाचम्यान, स्टिभ किंग र र्यान्डी फोर्ब्सका लागि सञ्चार पदहरूमा काम गरेर गरेका थिए। केही वर्ष उनी सेनेटर र्यान्ड पाउलका स्पोक्सपर्सन, सञ्चार निर्देशक र डेपुटी प्रमुखको रूपमा काम पनि गरिसकेका छन्।
सन् २०२० मा उनी ट्रम्पको ‘ट्रम्प भिक्ट्री फाइनान्स कमिटी’ का प्रमुख कर्मचारी बनेका थिए। उनले डोनाल्ड ट्रम्प जुनियरसँग मिलेर ‘विनिङ टीम पब्लिशिङ’ कम्पनी स्थापना गरेका थिए, जसले राष्ट्रपति ट्रम्पका केही पुस्तकहरू प्रकाशन गरेको थियो। दोस्रो ट्रम्प प्रशासन (जनवरी २०२५) मा उनले राष्ट्रपति सहायक र व्हाइट हाउस प्रेसिडेन्सियल पर्सनल अफिसका निर्देशकका रूपमा राजनीतिक नियुक्तिहरू छिटो नियुक्त गर्न जिम्मेवारी सम्हालेका थिए।
सर्जियो गोरको दक्षिण तथा मध्य एसियाका लागि विशेष दूतको भूमिका भारतमा राजदूत भएर पनि जारी छ। यस भूमिकामा उनलाई दक्षिण एसिया (भारत, पाकिस्तान, श्रीलंका, बंगलादेश, नेपाल, भुटान, माल्दिभ्स, अफगानिस्तान) र मध्य एसिया (काजाकिस्तान, किर्गिजस्तान, ताजिकिस्तान, टर्कमेनिस्तान, उजबेकिस्तान) मा अमेरिकी कूटनीतिक पहल अगाडि बढाउने जिम्मेवारी दिइएको छ। ट्रम्प प्रशासनले यसलाई “विश्वकै सबैभन्दा जनसंख्या बढी क्षेत्र” मा अमेरिकाको प्राथमिकता अगाडि बढाउने अवसरको रूपमा हेरेको छ ।
गोरका सार्वजनिक वक्तव्य, भ्रमण तालिकालाई हेर्ने हो भने ट्रम्प प्रशासनको आर्थिक संलग्नता, आपूर्ति शृंखला सुरक्षा, र “समृद्धिबाट शान्ति” नीति माथि जोड दिने दृष्टिकोणलाई झल्काउँछ।
अमेरिकी पक्षले गोरलाई विश्वकै रणनीतिक रूपमा महत्त्वपूर्ण क्षेत्रमा अमेरिकाको प्रतिनिधि व्यक्ति मानेको छ। उनको प्राथमिकता क्षेत्रीय आर्थिक अवसर, आपूर्ति शृंखला सुरक्षा र व्यावहारिक साझेदारीहरू मार्फत अमेरिकी हित सिधै लाभ पुग्ने नीति अगाडि बढाउनु रहेको छ।
टेलिफोन संवादका क्रममा रवि लामिछाने र गोरले आपसी चासोका विषयमा छलफल गरेका थिए, तर छलफलको विस्तृत विवरण सार्वजनिक गरिएको छैन।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
