चीनका परराष्ट्रमन्त्री वाङ यीले नेपालका नवनियुक्त परराष्ट्रमन्त्री शिशिर खनाललाई पदभार सम्हालेको अवसरमा बधाई दिएका छन्।

शुक्रबार पठाइएको सन्देशमा वाङले नेपाल र चीनबीचको सम्बन्ध परम्परागत रूपमा मैत्रीपूर्ण रहेको उल्लेख गरेका छन्। सन् १९५५ मा कूटनीतिक सम्बन्ध स्थापना भएदेखि दुवै देशले सुख–दुःखमा एकअर्कालाई साथ दिँदै आएको उनले बताएका छन्।

उनले द्विपक्षीय सम्बन्ध शान्तिपूर्ण सहअस्तित्वका पाँच सिद्धान्तका आधारमा निरन्तर अगाडि बढिरहेको पनि उल्लेख गरेका छन्। साथै, दुई देशबीच भएका महत्वपूर्ण सहमतिहरू कार्यान्वयन गर्न चीन तयार रहेको सन्देशमा जनाइएको छ।

वाङले नेपालसँग सहकार्यलाई अझ सुदृढ बनाउँदै दीर्घकालीन मैत्रीमा आधारित चीन–नेपाल रणनीतिक सहकार्य साझेदारीलाई थप उचाइमा पुर्‍याउन चीन प्रतिबद्ध रहेको बताएका छन्।