सरकारले संवत् २०८२ भदौ २३ र २४ गते भएको जेन–जी आन्दोलनका क्रममा प्रभावित परिवार र नागरिकहरूको न्याय, पुनर्स्थापना र राज्यप्रतिको विश्वास पुनःस्थापित गर्न एकीकृत पहल अघि बढाउने निर्णय गरेको छ।
सरकारले सार्वजनिक गरेको कार्यसूचीअनुसार उक्त आन्दोलनका क्रममा ज्यान गुमाएका शहीदका परिवार तथा घाइतेहरूको तथ्याङ्क संकलन र प्रमाणीकरण गर्ने काम प्राथमिकतामा राखिएको छ। त्यसपछि उनीहरूको सम्मानजनक पुनर्स्थापना, जीवनयापनको सुरक्षा र सामाजिक संरक्षण सुनिश्चित गर्ने योजना अघि सारिएको छ।
यस पहलअन्तर्गत प्रभावित व्यक्तिहरूलाई १०० दिनभित्र योग्यताअनुसार सरकारी, सार्वजनिक र निजी क्षेत्रमा रोजगारीका अवसर उपलब्ध गराउने उल्लेख गरिएको छ। साथै, उनीहरूका लागि सीप विकास कार्यक्रम सञ्चालन गर्ने, मनोसामाजिक परामर्श प्रदान गर्ने तथा पुनर्स्थापनासम्बन्धी सहयोग उपलब्ध गराउने व्यवस्था समेत समेटिएको छ।
सरकारले यो सम्पूर्ण कार्यक्रमलाई समेटेर एक समन्वित प्याकेज कार्यान्वयन गर्ने जनाएको छ, जसले आन्दोलनबाट प्रभावित व्यक्तिहरूलाई दीर्घकालीन राहत र स्थायित्व दिने लक्ष्य राखेको छ।
त्यसैगरी, उक्त आन्दोलनका क्रममा भएका घटनाको सत्यतथ्य छानबिन गर्न गठन गरिएको गौरीबहादुर कार्की आयोगको प्रतिवेदनका आधारमा दोषी व्यक्ति तथा पक्षमाथि प्रचलित कानूनअनुसार आवश्यक अनुसन्धान, कारबाही र अभियोजन प्रक्रिया तत्काल अघि बढाइने पनि कार्यसूचीमा उल्लेख गरिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
