प्रधानमन्त्री बालेन्द्र (बालेन) शाहले आफ्ना लामो समयदेखि नजिकका सहकर्मी सुरेन्द्र बजगाईंलाई प्रेस संयोजकमा नियुक्त गरेका छन्।
नयाँ जिम्मेवारीअनुसार बजगाईंले प्रधानमन्त्रीको सञ्चार समन्वय र मिडिया व्यवस्थापनको काम गर्नेछन्। स्रोतका अनुसार उनलाई शाखा अधिकृतसरहको सुविधा दिइनेछ।
सुरेन्द्र बजगाईं बालेन शाहको टोलीका लागि नयाँ नाम भने होइनन्। उनी विगत केही वर्षदेखि बालेनसँग नजिक रहेर काम गर्दै आएका छन्। बालेन काठमाडौं महानगरपालिकाको मेयर हुँदा पनि बजगाईंले प्रेस संयोजकका रूपमा काम गरेका थिए र मिडियासँगको समन्वय सम्हालेका थिए।
त्यसअघि उनी बालेनको चुनावी अभियानमा पनि सक्रिय रूपमा संलग्न थिए। विशेषगरी झापा क्षेत्र नम्बर ५ मा उनले अभियानसँग सम्बन्धित कामहरू गरेका थिए।
पेशागत रूपमा बजगाईं पत्रकारिता पृष्ठभूमिबाट आएका व्यक्ति हुन्। उनले नेपाल लाइभ, नेपालवाच र उकेरा जस्ता विभिन्न सञ्चारमाध्यममा रिपोर्टरका रूपमा काम गरिसकेका छन्। समाचार लेखन र फिल्ड रिपोर्टिङमा उनको अनुभव रहेको छ।
यसअघि उनी काठमाडौं महानगरपालिका कार्यालयमा मिडिया फ्यासिलिटेटर तथा एसोसिएट एक्सपर्टका रूपमा पनि कार्यरत थिए।
ललितपुरका स्थायी बासिन्दा बजगाईंलाई बालेन शाहको नजिकको र विश्वासिलो टोली सदस्यका रूपमा चिनिन्छ।
यो नियुक्तिसँगै प्रधानमन्त्री शाहले फेरि एकपटक आफ्नै विश्वासिलो घेराबाट व्यक्ति चयन गर्दै काम गर्ने आफ्नो शैलीलाई निरन्तरता दिएका छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
