नेकपा एमालेका युवा नेता सुहाङ नेम्वाङले संसदीय दलको नेता चयनसँग सम्बन्धित विषयलाई लिएर नेतृत्व र नेताहरूबारे आवेगात्मक टिप्पणी नगर्न पार्टी पङ्क्तिलाई अपिल गरेका छन् ।
उनले आफ्नो उम्मेदवारी पदलोलुपता वा व्यक्तिगत महत्त्वाकाङ्क्षाबाट प्रेरित नभई पार्टीभित्र नयाँ ऊर्जा र गतिशीलता ल्याउने उद्देश्यका साथ आएको स्पष्ट पारेका छन् । सांसद नेम्वाङले पार्टीका मार्गदर्शक सिद्धान्त तथा ऐतिहासिक मूल्य–मान्यताप्रति आफू पूर्ण प्रतिबद्ध रहेको उल्लेख गर्दै अग्रजहरूको अनुभव र युवाहरूको ऊर्जा नै पार्टी निर्माणको मुख्य आधार भएको बताएका छन् ।
पार्टी अहिले असाधारण संकट र चौतर्फी घेराबन्दीमा रहेको उल्लेख गर्दै उनले कार्यकर्तामा देखिएको निराशा हटाउन आफूले पहल गरेको दाबी गरेका छन् । आफ्नो उम्मेदवारीलाई उनले पार्टी र आन्दोलनका लागि ‘कालकूट विष’ पिएको रूपमा व्याख्या गरेका छन् ।
साथै, उनले सामाजिक सञ्जालमा नेतृत्व वा अन्य नेताहरूविरुद्ध नकारात्मक टिप्पणी नगर्न समर्थक तथा कार्यकर्तालाई आग्रह गरेका छन् । पार्टीको आन्तरिक लोकतन्त्र सुदृढ बनाउने प्रयासले कसैलाई कमजोर बनाउन नहुनेमा उनको जोड रहेको छ । आफ्ना धारणा आन्तरिक कमिटीमै छलफल गर्ने प्रतिबद्धता उनले व्यक्त गरेका छन् ।
यसैबीच, दलको नेतामा निर्वाचित रामबहादुर थापा ‘बादल’ लाई उनले बधाई दिँदै सफल कार्यकालको शुभकामना समेत व्यक्त गरेका छन् ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
