पूर्वप्रधानमन्त्री शेरबहादुर देउवा र उनकी पत्नी तथा पूर्वमन्त्री डा. आरजु राणा देउवाविरुद्ध पक्राउ पुर्जी जारी भएको विषयमा विभिन्न नेपाली सञ्चारमाध्यमहरूले रिपोर्ट गरेका छन्।

अनलाईन खबर र नेपाल प्रेस  लगायतका मिडियाले आफ्ना स्रोतलाई उद्धृत गर्दै काठमाडौं जिल्ला अदालतबाट पक्राउ अनुमति जारी भएको दाबी गरेका छन्।

ती रिपोर्टहरूका अनुसार सम्पत्ति शुद्धीकरण अनुसन्धान विभागले अवैध सम्पत्तिसम्बन्धी आरोपमा छानबिन गर्दै अदालतबाट पक्राउ अनुमति लिएको बताइएको छ। तर, उनीहरू हाल नेपालबाहिर रहेकाले पक्राउ नभएको जनाइएको छ।

मिडिया रिपोर्टअनुसार देउवा दम्पती हालैको निर्वाचनअघि उपचारका लागि सिंगापुर गएका थिए। त्यसपछि उनीहरू हङकङतर्फ गएको समेत खबरहरूमा उल्लेख गरिएको छ।

यसअघि जेन–जी आन्दोलनका क्रममा बुढानीलकण्ठस्थित देउवा निवासमा तोडफोड तथा आगजनी भएको घटना सार्वजनिक भएको थियो। त्यतिबेला जलेको अवस्थामा नगद भेटिएको भन्ने दाबीसमेत रिपोर्टमा उल्लेख गरिएको थियो।

सो घटनापछि सम्पत्ति शुद्धीकरण अनुसन्धान विभागका अधिकारीहरूले निवासमा पुगेर छानबिन सुरु गरेका थिए।

हाल यो अनुसन्धान केन्द्रीय अनुसन्धान ब्युरो मार्फत अघि बढाइएको मिडिया स्रोतहरूले जनाएका छन्।

यद्यपि यसबारे आधिकारिक रूपमा विस्तृत विवरण सार्वजनिक गरिएको छैन। सम्बन्धित निकायहरूले पनि सबै विषय औपचारिक रूपमा पुष्टि गर्न बाँकी रहेको जनाइएको छ।