भौतिक पूर्वाधार तथा यातायात मन्त्री सुनिल लम्सालको सम्पत्ति विवरण सार्वजनिक भएको छ। प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको विवरणअनुसार मन्त्री लम्साल र उनको परिवारको नाममा विभिन्न स्थानमा जग्गा, नगद, सुन र चाँदी रहेको उल्लेख गरिएको छ।

विवरणअनुसार मन्त्री लम्सालसँग ३० तोला सुन र ५० तोला चाँदी रहेको छ। साथै बैंक खातामा ९० लाख रुपैयाँ नगद रहेको विवरणमा उल्लेख गरिएको छ। सो रकम कुन बैंकमा रहेको भन्ने भने स्पष्ट खुलाइएको छैन।

परिवारको नाममा रहेको सम्पत्तिअन्तर्गत जमुना लम्सालको नाममा रुपन्देहीको तिलोत्तमा नगरपालिका–७ मा १ कठ्ठा १० धुर जग्गा रहेको छ। त्यस्तै नवलपरासीको कावासोतीमा १० कठ्ठा १५ धुर जग्गा पनि उनको नाममा रहेको विवरणमा देखाइएको छ।

त्यस्तै, बोधराज लम्सालको नाममा स्याङ्जामा ७ रोपनी खेत र २२ रोपनी बारी रहेको विवरणमा उल्लेख गरिएको छ।

मन्त्री लम्सालको सेयर बजार तथा अन्य लगानीसम्बन्धी विवरण भने सार्वजनिक गरिएको छैन।