थाइल्याण्डस्थित नेपाली राजदूतावासले कम्बोडियामा अलपत्र परेका ४६ जना नेपाली नागरिकको उद्धार गरी स्वदेश फिर्ता गरेको छ।
दूतावासका अनुसार ३० चैत र १ वैशाखमा उद्धार गरिएका उनीहरूलाई नेपाल फर्काइएको हो।
प्रलोभनमा परेर विभिन्न माध्यमबाट कम्बोडिया पुगेका नेपालीहरू अवैधरूपमा सञ्चालित अनलाइन स्क्यामिङ केन्द्र, क्यासिनोमा हुने अनलाइन ठगी तथा अन्य गैरकानुनी गतिविधिमा संलग्न गराइएको पाइएको दूतावासले जनाएको छ। तीमध्ये केही नेपाली बिनाभिसा बसिरहेको अवस्थामा पनि फेला परेका थिए।
दूतावासले कम्बोडियामा रहेका अन्य नेपाली नागरिकलाई पनि उद्धार गरी स्वदेश फर्काउने प्रक्रिया अघि बढिरहेको जानकारी दिएको छ। त्यहाँ रहेका नेपालीहरू अनलाइन ठगीलगायत गैरकानुनी कार्यमा लगाइएका र भिसा अवधि नाघेर बसिरहेको विवरण प्राप्त भएको दूतावासले जनाएको छ।
कम्बोडियाको पर्यटनसम्बन्धी तथ्यांकअनुसार पछिल्ला वर्षहरूमा नेपालीहरूको आगमन उल्लेख्य रूपमा बढेको देखिएको छ। सन् २०२१ मा १०१ जना नेपाली भ्रमण भिसामा कम्बोडिया गएका थिए भने २०२२ मा १९७७, २०२३ मा २९४०, २०२४ मा ६४०४ र २०२५ मा ९६७६ जना पुगेको तथ्यांकमा उल्लेख छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
