प्रतिनिधिसभा अन्तर्गतका १० विषयगत र २ संयुक्त समितिका सभापतिका लागि उम्मेदवारी दर्ता भएको छ।

संघीय संसद सचिवालयले तोकेको समयभित्र सबै समितिका सभापतिका लागि मनोनयन दर्ता भएको हो।

कानून, न्याय तथा मानवअधिकार समितिमा समीक्षा बास्कोटा, कृषि, सहकारी तथा प्राकृतिक स्रोत समितिमा अशोक चौधरी, पूर्वाधार विकास समितिमा आशिष गजुरेल, महिला तथा सामाजिक मामिला समितिमा आकृति अवस्थी र राज्य व्यवस्था तथा सुशासन समितिमा हरि ढकालले उम्मेदवारी दिएका छन्।

शिक्षा, स्वास्थ्य तथा सूचना प्रविधि समितिमा रास्वपाका डा. ओजस्वी शेरचन र एमालेका गुरु बरालबीच प्रतिस्पर्धा हुने भएको छ।

त्यस्तै सार्वजनिक लेखा समितिमा कांग्रेसका भरतबहादुर खड्का, अन्तर्राष्ट्रिय सम्बन्ध तथा पर्यटन समितिमा सुम्नीमा उदास, अर्थ समितिमा कृष्णहरि बुढाथोकी र उद्योग समितिमा रहवर अन्सारीले उम्मेदवारी दिएका छन्।

संयुक्त समितितर्फ संसदीय सुनुवाइ समितिमा बोधनारायण श्रेष्ठले मनोनयन दर्ता गरेका छन् भने राज्यका निर्देशक सिद्धान्त, नीति तथा दायित्व कार्यान्वयन अनुगमन तथा मूल्याङ्कन समितिमा रास्वपाका गणेश कार्की र नेकपाका तर्फबाट राष्ट्रिय सभा सदस्य मदनकुमारी शाह (गरिमा) उम्मेदवार बनेका छन्।

संसद सचिवालयका अनुसार शुक्रबार सम्बन्धित समितिको बैठकमा उम्मेदवारीसम्बन्धी प्रस्ताव निर्णयका लागि पेश गरिनेछ र त्यसपछि सभापति निर्वाचित भएको घोषणा गरिनेछ।