संघीय संसद्अन्तर्गत रहेका विभिन्न संसदीय समितिहरूको सभापतिको निर्वाचन आज (वैशाख ४) हुने भएको छ ।

संघीय संसद् सचिवालयका अनुसार प्रतिनिधिसभाअन्तर्गतका विषयगत समिति र संयुक्त समितिको छुट्टाछुट्टै बैठक दिउँसो १ बजे बस्नेछ । सोही बैठकबाट सम्बन्धित समितिका सभापति चयन गरिने जनाइएको छ ।

यसअघि बिहीबार (वैशाख ३) सभापतिका लागि मनोनयन दर्ता गरिएको थियो । शिक्षा समिति र राज्यका निर्देशक सिद्धान्त, नीति तथा दायित्वको कार्यान्वयन अनुगमन तथा मूल्यांकन समितिमा दुई–दुई जनाको उम्मेदवारी परेको छ भने अन्य समितिहरूमा एकल उम्मेदवारी परेको छ ।

कानुन, न्याय तथा मानवअधिकार समितिको सभापतिमा समीक्षा बास्कोटा र कृषि, सहकारी तथा प्राकृतिक स्रोत समितिमा अशोककुमार चौधरीले उम्मेदवारी दिएका छन् ।

पूर्वाधार विकास समितिमा आशिष गजुरेल, महिला तथा सामाजिक मामिला समितिमा आकृति अवस्थी तथा राज्य व्यवस्था तथा सुशासन समितिमा हरि ढकालको उम्मेदवारी परेको छ ।

त्यस्तै अन्तर्राष्ट्रिय सम्बन्ध तथा पर्यटन समितिमा सुम्नीमा उदास, अर्थ समितिमा कृष्णहरि बुढाथोकी र उद्योग, वाणिज्य, श्रम तथा उपभोक्ता हित समितिमा रहबर अन्सारीको उम्मेदवारी परेको छ ।

सार्वजनिक लेखा समितिमा कांग्रेसका सांसद भरतबहादुर खड्काले उम्मेदवारी दिएका छन् । संयुक्त समितिअन्तर्गत संसदीय सुनुवाइ समितिको सभापतिमा बोधनारायण श्रेष्ठको उम्मेदवारी परेको छ ।

शिक्षा, स्वास्थ्य तथा सूचना प्रविधि समितिको सभापतिमा रास्वपाबाट डा. ओजस्वी शेरचन र एमालेका गुरु बरालबीच प्रतिस्पर्धा हुने भएको छ ।

यसैगरी संयुक्त समितिअन्तर्गत राज्यका निर्देशक सिद्धान्त, नीति तथा दायित्वको कार्यान्वयन अनुगमन तथा मूल्यांकन समितिको सभापतिमा रास्वपाका गणेश कार्की र नेकपाका मदनकुमारी शाह (गरिमा)बीच प्रतिस्पर्धा रहनेछ ।

आज बस्ने सम्बन्धित समितिको बैठकबाट सभापतिहरूको अन्तिम टुंगो लाग्नेछ ।