लेबनान र इजरायलबीच १० दिनको अस्थायी युद्धविराममा सहमति भएको छ ।

डोनाल्ड ट्रम्पले बिहीबार यसको घोषणा गर्दै ३४ वर्षपछि भएको पहिलो औपचारिक वार्तापछि यो उपलब्धि हासिल भएको बताएका छन् ।

यो युद्धविरामलाई दुवै पक्षको प्रतिबद्धता परीक्षण गर्ने ‘टेस्टिङ पिरियड’का रूपमा लिइएको छ । यो अवधिमा सहमति उल्लंघन नभए स्थायी शान्तिको सम्भावना खुल्न सक्ने संकेत गरिएको छ ।

ट्रम्पले आफ्नो सामाजिक सञ्जाल ट्रुथ सोसलमार्फत जोसेफ औन र बेन्जामिन नेतन्याहुसँग सकारात्मक वार्ता भएको उल्लेख गर्दै “यो मेरो १०औँ युद्ध समाधान हुनेछ” भन्ने दाबी गरेका छन् ।

यो युद्धविराम बिहीबार रातिदेखि लागू भएको जनाइएको छ । यसअघि वासिङ्टन डीसीमा दुवै देशका प्रतिनिधिबीच वार्ता भएको थियो, जसलाई सन् १९८३ पछिको पहिलो महत्वपूर्ण प्रत्यक्ष संवाद मानिएको छ ।

ट्रम्पले दुवै देशका नेताहरूलाई ह्वाइट हाउसमा निमन्त्रणा गर्ने योजना पनि सार्वजनिक गरेका छन् ।

लेबनानका राष्ट्रपति औनले ट्रम्पलाई धन्यवाद दिँदै क्षेत्रीय स्थायित्वका लागि प्रयास जारी रहने बताएका छन् । उनले दीर्घकालीन शान्तिका लागि पहल जारी राख्ने बताएका छन् ।

लेबनान सरकारले हिजबुल्लाहलाई शान्तिपूर्वक हतियार त्याग्न मनाउने प्रयास भइरहेको जनाएको छ ।

यता हिजबुल्लाहका नेता हसन फदलल्लाहले इजरायलले शत्रुतापूर्ण गतिविधि पूर्ण रूपमा रोक्ने वा नरोक्ने अवस्थाका आधारमा आगामी कदम तय गरिने बताएका छन् ।