लामो समयदेखि आर्थिक समस्यासँग जुधिरहेको हेटौँडा सिमेन्ट उद्योग फेरि बन्द भएको छ। कच्चा पदार्थ अभावका कारण उद्योगले उत्पादन रोक्न बाध्य भएको हो।

उद्योगले गत महिना क्लिङ्कर उत्पादन गरे पनि त्यसपछि आवश्यक कच्चा पदार्थ नपाएपछि उत्पादन प्रक्रिया ठप्प भएको छ। उद्योगका सहायक प्रबन्धक भक्तिराम श्रेष्ठका अनुसार कोइला, ढुङ्गालगायत आवश्यक सामग्रीको अभाव रहेको छ।

उनले कच्चा पदार्थ आपूर्तिका लागि सम्झौता भए पनि रकम अभावका कारण ठेकेदारले ढुवानी गर्न नसकेको बताए। त्यसैले तत्काल कच्चा पदार्थ आउने सम्भावना नरहेको र उद्योग बन्द गर्नुपरेको उनको भनाइ छ।

हाल उद्योगमा रहेको कच्चा पदार्थ प्रयोग गरेर करिब पाँच हजार टन क्लिङ्कर उत्पादन गरिएको छ। अहिले सो क्लिङ्करबाट सिमेन्ट ‘प्याकेजिङ’ मात्र भइरहेको छ।

दैनिक १६ हजार बोरा सिमेन्ट उत्पादन क्षमता रहेको यो उद्योग पछिल्लो समय प्रायः बन्द अवस्थामा रहँदै आएको छ। क्लिङ्कर उत्पादनका क्रममा मेसिनमा देखिएको समस्याका कारण मर्मत कार्य पनि जारी रहेको जनाइएको छ।

उद्योगको आर्थिक अवस्था कमजोर हुँदा कर्मचारीहरू समेत प्रभावित भएका छन्। उद्योगमा कार्यरत कर्मचारीहरूले विगत १० महिनादेखि तलब पाएका छैनन्।

हाल उद्योगमा १६६ स्थायी कर्मचारी, १०० दैनिक ज्यालादारी र ५२ जना सुरक्षाकर्मी कार्यरत छन्।

विसं २०३३ मा हेटौँडाको लामसुरेमा स्थापना भएको यो उद्योगले विसं २०४३ देखि सिमेन्ट उत्पादन सुरु गरेको थियो। अहिले भने कच्चा पदार्थ अभाव र आर्थिक संकटका कारण उद्योग सञ्चालनमा चुनौती थपिएको छ।