नेपाल सरकारले अमेरिकासँग प्रस्ताव गरिएको ‘बेल ४१२’ हेलिकोप्टरको सट्टा भारी तौल उठाउन सक्ने ‘हेभी–लिफ्ट’ हेलिकोप्टर उपलब्ध गराउन प्रस्ताव पठाउने निर्णय गरेको छ ।
अमेरिकाले ‘फरेन मिलिटरी फाइनान्सिङ’ कार्यक्रमअन्तर्गत नेपाली सेनालाई ६ वटा हेलिकोप्टर दिने प्रस्ताव गरेको थियो । तर, परराष्ट्र मन्त्रालयका अधिकारीहरूका अनुसार अहिलेको आवश्यकता यात्रु ओसार्ने मात्रै नभई पूर्वाधार निर्माणमा सहयोग पुर्याउने विमानतर्फ केन्द्रित भएको छ ।
दुर्गम क्षेत्रमा स्टिलका बिम, कंक्रिट, काठ तथा भारी मेसिनरी पुर्याउन बाहिरी ‘स्लिङ’ वा ‘हुक’ प्रयोग गर्न मिल्ने हेलिकोप्टर आवश्यक रहेको बताइएको छ । सडक पहुँच नभएका स्थानमा ठूला आयोजना सञ्चालनका लागि यस्ता हेलिकोप्टर महत्वपूर्ण हुने विश्वास गरिएको छ ।
सन् २०२४ अगस्टमा अमेरिकी उपविदेशमन्त्री रिचर्ड आर. बर्माले करिब १०० मिलियन डलर बराबरको सहायता घोषणा गरेका थिए । त्यसपछि जनवरी २०२६ मा अमेरिकी दूतावासले ६ वटा हेलिकोप्टर उपलब्ध गराउने औपचारिक प्रस्ताव गरेको थियो ।
यसअघि अगस्ट २०२५ मा ३७ मिलियन डलरको अनुदानमा दुईवटा पीजेडएल–२८ ब्लक ०५ ‘स्काइ ट्रक’ नेपाल ल्याइएको थियो । हाल नेपाली सेनासँग पाँचवटा ‘स्काइ ट्रक’ रहेका छन्, जसमध्ये एउटा ‘एयर एम्बुलेन्स’का रूपमा प्रयोग भइरहेको छ ।
नेपालको यो निर्णयले अन्तर्राष्ट्रिय शक्ति सन्तुलनमा समेत अर्थ राख्ने विश्लेषण गरिएको छ । यसअघि नेपाली सेनाले रुसबाट दुईवटा एमआई–१७भी–५ हेलिकोप्टर किन्ने योजना बनाएको भए पनि अमेरिकी प्रस्तावपछि त्यो प्रक्रिया रोकिएको बताइएको छ ।
दक्षिण एसियामा चिनियाँ प्रभाव सन्तुलनमा राख्न अमेरिकाले नेपालको सैन्य क्षमता सुदृढीकरणमा चासो देखाइरहेको विश्लेषकहरू बताउँछन् ।
नेपालजस्तो भूकम्प, पहिरो र बाढीको उच्च जोखिम रहेको देशमा ‘सर्ट टेक–अफ एन्ड ल्यान्डिङ’ क्षमता भएका विमान तथा भारी सामान बोक्ने हेलिकोप्टरहरू उद्धार र पुनर्स्थापनाका लागि अत्यन्त आवश्यक मानिन्छन् ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
