अन्तर्राष्ट्रिय क्रिकेट काउन्सिल (आईसीसी) क्रिकेट विश्वकप लिग–२ अन्तर्गत जारी खेलमा ओमानले नेपालसामु ३०६ रनको चुनौतीपूर्ण लक्ष्य प्रस्तुत गरेको छ ।

कीर्तिपुरस्थित त्रिवि क्रिकेट मैदानमा टस जितेर ब्याटिङ रोजेको ओमानले निर्धारित ५० ओभरमा आठ विकेट गुमाउँदै ३०५ रन बनाएको हो ।

ओमानका कप्तान तथा ओपनर जतिन्दर सिंहले उत्कृष्ट प्रदर्शन गर्दै १३० रनको शतकिय इनिङ खेले । उनले ९६ बलमा १५ चौका र पाँच छक्का प्रहार गरे । जतिन रामानन्दीले ४३ रन जोडे भने आयर्न विस्टले ३५ रन बनाए । हम्माद मिर्जाले ३० रन बनाउँदा आशिष ओदेडारा र विनायक शुक्लाले समान २३ रन योगदान गरे । वसिम अली १२ रनमा अविजित रहे ।

ओमानका लागि पहिलो विकेटमा जतिन्दर र आशिषबीच ८० रनको साझेदारी भयो । तेस्रो विकेटका लागि जतिन्दर र हम्मादले ८१ रन जोडेका थिए ।

नेपालका सोमपाल कामीले सर्वाधिक चार विकेट लिए । सन्दीप लामिछाने र दीपेन्द्रसिंह ऐरीले समान दुई–दुई विकेट हात पारे ।

नेपाल यस श्रृंखलामा लगातार दोस्रो जितको खोजीमा छ । पहिलो खेलमा नेपालले यूएईलाई ३७ रनले पराजित गरेको थियो । २१ खेल खेलेको नेपाल १४ अंकसहित तालिकाको सातौं स्थानमा छ ।

ओमान भने श्रृंखलामा पहिलो जित निकाल्ने लक्ष्यसहित मैदानमा उत्रिएको छ । पहिलो खेलमा ओमान यूएईसँग २५ रनले पराजित भएको थियो । २५ खेलबाट २९ अंक जोडेको ओमान हाल तालिकाको तेस्रो स्थानमा छ ।