प्रधानमन्त्री केपी शर्मा ओलीसँग चालु आर्थिक वर्षमा गरिने मुख्य काम र हासिल हुने उपलब्धिका लागि उपप्रधानमन्त्रीद्वय तथा मन्त्रीहरूबीच आज कार्यसम्पादन सम्झौता हुने भएको छ।
प्रधानमन्त्री तथा मन्त्रिपरिषद्को कार्यालय, सिंहदरबारमा दिउँसो १ बजे हुने कार्यक्रममा मन्त्रालयगत वार्षिक प्रगति समीक्षा र कार्यसम्पादन सम्झौतामा हस्ताक्षर गरी आदानप्रदान गरिनेछ। गत वर्ष भदौ २७ गते सम्पन्न भएको यस्तो सम्झौता यस वर्ष झण्डै एक महिना अगाडि हुँदैछ, जसले वर्षभरीका कार्य तथा उपलब्धि छिटो र प्रभावकारी रूपमा कार्यान्वयन हुने अपेक्षा गरिएको प्रधानमन्त्री ओलीका निजी सचिव विनोदबहादुर कुँवरले जानकारी दिए।
‘समृद्ध नेपाल, सुखी नेपाली’को राष्ट्रिय आकांक्षा पूरा गर्न पूर्वाधार निर्माण तथा सेवा प्रवाहमा सुधारका लक्ष्यसहित यो अभ्यास प्रधानमन्त्री ओलीको अघिल्लो कार्यकालमा सुरु गरिएको हो। सम्झौता पश्चात मन्त्रीहरूले सम्बन्धित सचिवहरूसँग पनि कार्यसम्पादन सम्झौता गर्ने व्यवस्था रहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
