राष्ट्रिय स्वतन्त्र पार्टी (रास्वपा)को केन्द्रीय समिति बैठक मंगलबार बिहान ८ बजे पार्टी केन्द्रीय कार्यालय, वनस्थलीमा बस्ने भएको छ।
पार्टीले जारी गरेको सूचनाअनुसार बैठकमा समसामयिक राजनीतिक अवस्था, संगठनको सुदृढीकरण र आगामी रणनीतिबारे गम्भीर छलफल हुनेछ। यसका लागि सातवटा मुख्य एजेन्डा तय गरिएको छ।
बैठकको प्रारम्भिक सत्रमा हालै सम्पन्न प्रदेशस्तरीय बैठकहरूबाट प्राप्त प्रतिवेदन सभापतिहरूले प्रस्तुत गर्नेछन्। त्यसपछि परिवर्तित राजनीतिक परिदृश्यबारे केन्द्रीय सदस्यहरूले आफ्नो धारणा राख्ने कार्यक्रम रहेको छ।
रास्वपाले बैठकमा पार्टी संगठन र विभागीय संरचनाबारे पनि चर्चा गर्ने जनाएको छ। साथै आसन्न प्रतिनिधि सभा सदस्य निर्वाचनलाई ध्यानमा राखी पार्टीले अपनाउने रणनीति तय गर्ने तयारी गरिएको छ।
पार्टीका अनुसार बैठकमा आगामी ऐतिहासिक महाधिवेशनसम्बन्धी तयारीबारे विस्तृत छलफल हुनेछ। साथै अन्य विविध विषयमा आवश्यक निर्णय गर्ने एजेन्डा पनि बैठकमा समावेश गरिएको छ।
