राष्ट्रिय स्वतन्त्र पार्टी (रास्वपा)ले प्रतिनिधिसभा निर्वाचनका लागि समानुपातिक तर्फको उम्मेदवारी आवेदन दिने समय सीमा थप गरेको छ। बिहीबार बसेको पार्टी सचिवालय बैठकले नयाँ म्याद पुस ५ गतेसम्म कायम रहने निर्णय गरेको हो।
पार्टी प्रवक्ता मनिष झाले जारी गरेको विज्ञप्तिअनुसार पार्टी एकीकरण प्रक्रियामा भर्खर समावेश भएको समूहका सदस्यहरूको प्राविधिक प्रक्रिया पूरा गर्न समय आवश्यक भएकाले म्याद थपिएको हो। साथै, उच्च संवाद समितिबाट अन्य समूहसँग भइरहेको सम्भावित सहकार्य र एकता प्रयास पनि यस निर्णयको कारण रहेको बताइएको छ।
जेन–जी समूह र सरकारले हालै गरेको सम्झौतापछिको राजनीतिक परिवेशलाई समेत ध्यानमा राख्दै उम्मेदवारी दर्ताको समय विस्तार गरिएको रास्वपाले स्पष्ट पारेको छ। आवश्यकता परे कुनै पनि समयमा आवेदन प्रक्रिया रोकिन सक्ने भन्दै पार्टीले आकांक्षीहरूलाई सावधानीपूर्वक आवेदन दिन आग्रह गरेको छ।
यसअघि नै आवेदन खुला गरिसकेको रास्वपामा अब इच्छुकहरूले पुस ५ गतेसम्म समानुपातिक उम्मेदवारीका लागि फारम बुझाउन सक्नेछन्।
