नक्कली शैक्षिक प्रमाणपत्र प्रयोग गरी नेपाल प्रहरीमा सेवा प्रवेश र क्रमिक बढुवा लिएको अभियोगमा प्रहरी वरिष्ठ उपरीक्षक लालबाबु गिरीविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ।
आयोगका सहायक प्रवक्ता गणेशबहादुर अधिकारीका अनुसार मंगलबार (पुस ८) गिरीविरुद्ध विशेष अदालतमा आरोपपत्र दायर गरिएको हो। आयोगले जारी गरेको विज्ञप्तिमा गिरीले सन् १९८८ मा भारतको विहार स्कुल एक्जामिनेशन बोर्ड, पटनाबाट एसएलसी उत्तीर्ण गरेको भनी पेस गरेको शैक्षिक प्रमाणपत्र नक्कली रहेको पुष्टि भएको उल्लेख गरिएको छ।
अनुसन्धानका क्रममा उक्त नक्कली एसएलसी प्रमाणपत्रकै आधारमा गिरीले वि.सं. २०५० सालमा त्रिभुवन विश्वविद्यालयबाट र २०६३ सालमा पूर्वाञ्चल विश्वविद्यालयबाट शैक्षिक योग्यता हासिल गरेको खुलेको आयोगले जनाएको छ।
त्यही प्रमाणपत्र प्रयोग गरी गिरीले वि.सं. २०५२ मंसिर १६ गते नेपाल प्रहरीको प्रहरी नायब निरीक्षक (प्राविधिक) पदमा नियुक्ति लिएको र त्यसपछि क्रमशः बढुवा हुँदै हाल प्रहरी वरिष्ठ उपरीक्षक पदसम्म पुगेको आयोगको दाबी छ।
आयोगका अनुसार नक्कली प्रमाणपत्रका आधारमा गिरीले पद, तलब, सुविधा तथा विभिन्न तालिमसमेत लिएको देखिएको छ। सोही आधारमा आयोगले साविक भ्रष्टाचार निवारण ऐनअनुसार गिरीविरुद्ध सजाय मागदाबी गर्दै विशेष अदालतमा मुद्दा दायर गरेको हो।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
