धादिङ–१ बाट राष्ट्रिय स्वतन्त्र पार्टी (रास्वपा) की उम्मेदवार आशिका तामाङले आफ्नो प्रतिद्वन्द्वी, नेपाली कम्युनिस्ट पार्टीका उम्मेदवार राजेन्द्र पाण्डेमाथि आरोप लगाएकी छिन्।
आशिका तामाङका अनुसार, पाण्डेका कार्यकर्ताले चुनावी अभियानका लागि प्रयोग गरिएको गाडीलाई फोकटपुर क्षेत्रको चारपार्टीमा घेराबन्दी गरी धम्की दिने तथा गाडी कुच्याउने गरी तोडफोड गरेका हुन्।
तर उक्त आरोपको खण्डन गर्दै सो क्षेत्रका चुनावी संयोजक दयाराम कार्कीले घटना फरक ढंगले प्रस्तुत गरेका छन्। कार्कीका अनुसार, “आज हामीले तपाईलाई सहयोग गरेका थियौँ। तपाईको गाडी अगाडि थियो, अर्को पछाडिको गाडीलाई हामीले उकालो बाटोमा धकेलेर सहयोग गरेका हौँ। तपाईको कार्यकर्ता र गाडीलाई सम्मानजनक रूपमा अगाडि पठाएका हौँ। त्यसैलाई झडप र गुण्डागर्दी भन्ने शैली मिलेन।”
उनले थप भनेका छन्, “कुनै बेला तपाई दुःखमा हुँदा चौकीसम्म धाउने र तपाईलाई रिहाइ गर्न पहल गर्ने मान्छे पनि म नै हुँ। आज सामान्य जम्का भेटघाटसँगै नकारात्मक प्रचारबाजी र मिडिया ट्रायल गर्नु गलत हो। कुप्रचारतिर नलाग्न आग्रह गर्दछु। स्वस्थ प्रतिस्पर्धा गरौँ। तपाईले मिडियाबाजी गर्नुभयो, त्यो गलत छ।”
यस घटनालाई लिएर दुवै पक्षबीच आरोप–प्रत्यारोप जारी रहेको छ। एकातर्फ आशिका तामाङले चुनावी अभियानका क्रममा तोडफोड र धम्कीको आरोप लगाएकी छन् भने अर्कोतर्फ दयाराम कार्कीले त्यसलाई अस्वीकार गर्दै सहयोग गरेको दाबी गरेका छन्।
घटनाबारे आधिकारिक निकायबाट थप स्पष्ट जानकारी आउन बाँकी छ। निर्वाचनको माहोलबीच यस्ता विवाद सार्वजनिक हुँदा सम्बन्धित पक्षहरूलाई संयमता अपनाउँदै स्वस्थ र मर्यादित प्रतिस्पर्धा गर्नुपर्ने आवश्यकता देखिएको छ।
