रास्वपा सभापति रवि लामिछानेमाथिको संगठित अपराध र सम्पत्ति शुद्धीकरणसम्बन्धी मुद्दा फिर्ता गर्ने महान्यायाधिवक्ताको निर्णयविरुद्ध दायर रिटमाथि आज पनि सर्वोच्च अदालतमा सुनुवाइ हुँदैछ।

न्यायाधीशद्वय विनोद शर्मा र अब्दुल अजिज मुसलमानको संयुक्त इजलासमा हेर्दाहेर्दैमा रहेको यो मुद्दाको सुनुवाइ पछिल्ला केही दिनदेखि निरन्तर रूपमा चलिरहेको छ।

यसअघि मंगलबार रिट निवेदकको तर्फबाट बहस सकिएको थियो। आज महान्यायाधिवक्ता कार्यालयको तर्फबाट सरकारी वकिलहरू जवाफी बहसमा उत्रिने कार्यक्रम रहेको छ।

महान्यायाधिवक्ता सविता भण्डारीले पुस ३० गते लामिछानेको हकमा अभियोगपत्र संशोधन गर्ने निर्णय गरेकी थिइन्। त्यसपछि व्यापक आलोचना भएपछि २ माघमा अन्य सबै आरोपितहरूको हकमा पनि अभियोगपत्र संशोधन गर्ने निर्णय गरिएको थियो।

यस मुद्दासम्बन्धी निर्णयका कागजातहरू सर्वोच्च अदालतले यसअघि नै महान्यायाधिवक्ता कार्यालयबाट मगाइसकेको छ।

लगातार सुनुवाइ भइरहेकाले आजै फैसला आउने हो कि भन्ने चासो बढेको छ। तर, इजलासले बहस सकिएपछि मात्र निर्णय दिने भएकाले आजै फैसला आउने वा नआउनेबारे स्पष्ट भइसकेको छैन।