सिंहदरबार परिसरमा कानुन व्यवसायीको प्रवेशमा गरिएको कडाइप्रति चासो व्यक्त गर्दै एमालेका युवा सांसद सुहाङ नेम्वाङले प्रधानमन्त्रीको ध्यानाकर्षण गराएका छन्।
नेम्वाङले नेपाल बार काउन्सिलबाट जारी गरिएको परिचयपत्रका आधारमा कानुन व्यवसायीलाई सहज रूपमा सिंहदरबार प्रवेशको व्यवस्था मिलाउन लिखित रूपमा आग्रह गरेका हुन्। यस विषयमा उनले प्रधानमन्त्रीको सचिवालयलाई मौखिक जानकारी समेत गराएको बताएका छन्।
उनले नागरिकले आफ्नो मुद्दामा प्रतिनिधित्व गर्न वा प्रशासनिक कामका लागि कानुन व्यवसायी नियुक्त गर्न पाउने संवैधानिक अधिकार रहेको स्मरण गराएका छन्। सिंहदरबारभित्र रहेका मन्त्रालय, प्रशासनिक निकाय तथा अदालतमा सेवाग्राहीले वकिलसहित प्रवेश गर्न पाउनु न्यायमा पहुँच सुनिश्चित गर्ने महत्वपूर्ण पक्ष भएको उनको भनाइ छ।
नेम्वाङका अनुसार अदालतबाट नेपाल सरकार वा विभिन्न मन्त्रालयका नाममा जारी आदेश तथा फैसलाको कार्यान्वयनका लागि सम्बन्धित निकाय र कानुन व्यवसायीबीच प्रत्यक्ष सम्पर्क आवश्यक हुन्छ। त्यसका लागि सहज पहुँच अनिवार्य रहेको उनले उल्लेख गरेका छन्।
साथै सिंहदरबारभित्र रहेका विभिन्न निकाय र संसदीय दलका कार्यालयहरूले कानुनी परामर्शका लागि वकिल नियुक्त गर्ने अभ्यास रहेको पनि उनले स्मरण गराएका छन्।
यसअघि वकिललाई परिचयपत्रका आधारमा सहज प्रवेश दिने व्यवस्था मिलाउने श्रेय उनका पिता तथा तत्कालीन सभामुख सुवास नेम्वाङलाई जाने बताइएको छ। तत्कालीन नेपाल बारका उपाध्यक्ष टीकाराम भट्टराईका अनुसार सुवास नेम्वाङले गृहमन्त्री कृष्णप्रसाद सिटौलासँग समन्वय गरी यस्तो व्यवस्था लागू गराएका थिए।
हाल भने प्रशासकीय अदालतका रजिष्टार सरोजराज रेग्मीले सूचना जारी गर्दै कानुन व्यवसायीले नागरिक एपमार्फत प्राप्त सिंहदरबार गेट पासका आधारमा मात्र प्रवेश गर्नुपर्ने व्यवस्था रहेको बताएका छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
