प्रगतिशील लोकतान्त्रिक पार्टी (प्रलोपा) ले आइतबार आफ्ना शीर्ष नेतृत्व संरचनाको पहिलो चरण सार्वजनिक गरेको छ। सात सदस्यीय अध्यक्षमण्डलसहितको संरचनामा विघटित प्रतिनिधिसभा सदस्य सन्तोष परियारलाई पहिलो अध्यक्षका रूपमा चयन गरिएको पार्टी स्रोतले जनाएको छ।
परियार यसअघि राष्ट्रिय स्वतन्त्र पार्टी (रास्वपा) का नेता थिए। अध्यक्षमण्डलमा परियारसँगै सुदन किराँती, दुर्गा सोब, मधेशी र जेन–जेड समुदायको प्रतिनिधित्व समावेश हुने नेपाल समाजवादी पार्टी (नयाँ शक्ति) का प्रवक्ता कृष्ण शर्माले जानकारी दिए।
प्रलोपा गठनसँगै १५१ सदस्यीय केन्द्रीय समिति पनि बनाइने भएको छ। दुर्गा सोब नेतृत्वको नयाँ शक्ति, सुदन किराँती संयोजकको प्रगतिशील राष्ट्रिय अभियान र सन्तोष परियार समूहबीच आज एकता घोषणा हुँदैछ।
पार्टीमा डा. बाबुराम भट्टराई संरक्षकका रूपमा रहनेछन्। त्यस्तै पार्टीको नीति परिषद्मा जनार्दन शर्मा, राम कार्कीलगायतका नेताहरू रहने बताइएको छ।
अध्यक्षमण्डलको एक स्थान भने अहिले रिक्त छ। सोमबार अशोक राई नेतृत्वको जनता समाजवादी पार्टीसँग एकता घोषणा भएपछि त्यो पद समेत टुंगिने र अध्यक्षमण्डल पूर्ण हुने जनाइएको छ।
