नेपाली कांग्रेसले समानुपातिक उम्मेदवारको बन्दसूची समयसीमाभित्र निर्वाचन आयोगमा बुझाउन सकेको छैन। आज बिहानसम्म पनि कांग्रेसको सूची आयोगमा दर्ता भएको छैन।
हिजो राति नै बन्दसूची आयोगमा बुझाउने प्रयास भए पनि पार्टी सभापति शेरबहादुर देउवाको हस्ताक्षर नहुँदा आयोगले सूची स्वीकार गरेन। त्यसपछि नेता मीन विश्वकर्मा र मुख्य सचिव कृष्णप्रसाद पौडेलसहितका नेताहरू हस्ताक्षर लिन देउवाको निवासतर्फ गएका थिए। तर उनीहरू अझै आयोग फर्किन सकेका छैनन्।
निर्वाचन आयोगले हिजो रातिसम्म आयोग पुगेका दलहरूलाई आजसम्मको समय दिएको जनाएको छ। सोही समयसीमाभित्र कांग्रेसले सूची बुझाउने प्रयास गरिरहेको छ।
कांग्रेसले अर्जुननरसिंह केसी र भीष्मराज आङदम्बेलगायत नेताहरूको नाम समानुपातिक उम्मेदवारका रूपमा तय गरेको छ। सभापति देउवा पक्ष र इतर पक्षबीच ६०/४० को भागबन्डाका आधारमा उम्मेदवार छानिएको बताइएको छ।
