राष्ट्रिय स्वतन्त्र पार्टी (रास्वपा) ले आज वृहत्तर एकता घोषणा सभा गर्दै विभिन्न समूहसँगको एकता औपचारिक रूपमा सार्वजनिक गर्ने भएको छ । पार्टीका अनुसार एकता घोषणा सभा आज दिउँसो १ बजे राष्ट्रियसभा गृहमा हुनेछ ।
काठमाडौँका मेयर बालेन्द्र शाह, उज्यालो नेपाल पार्टी र अन्य समूहबाट आएका नेता तथा कार्यकर्ताको व्यवस्थापनपछि रास्वपाले एकताको घोषणा गर्न लागेको हो । पुस १३ र १४ गते रास्वपाले बालेन शाह र कुलमान घिसिङ नेतृत्वको उज्यालो नेपाल पार्टीसँग एकता गर्ने सहमति गरेको थियो ।
आजको सभाबाट एकता प्रक्रियाले पूर्णता पाउने र आगामी दिनमा पार्टीको राजनीतिक कार्यदिशाबारे स्पष्ट सन्देश दिइने रास्वपाले जनाएको छ । साथै, नयाँ शक्ति एकताबद्ध भएको सन्देश आम जनतामा प्रवाह गरिने पार्टीको विश्वास छ ।
यसअघि आइतबार बसेको रास्वपाको बैठकले पार्टीमा आएका नयाँ नेता तथा कार्यकर्ताको व्यवस्थापनका लागि केन्द्रीय समितिमा थप मनोनयन गर्ने निर्णय गरेको थियो । पार्टीले पदाधिकारीसमेत थप गर्दै संगठनलाई मजबुत बनाउने तयारी गरेको जनाएको छ ।
