बेलायतस्थित नेपाली दूतावासले कामका लागि स्पोन्सरसिप उपलब्ध गराइदिने बहानामा ठगी बढ्दै गएको भन्दै नेपाली समुदायलाई सचेत रहन आग्रह गरेको छ ।
दूतावासका अनुसार पछिल्लो समय संयुक्त अधिराज्यमा रोजगारी दिलाइदिने नाममा ठगीका घटनाहरू बढेका छन् । यसमा नेपालबाट बेलायत आउन चाहनेहरू मात्र नभई हाल बेलायतमै बसोबास गरिरहेका नेपालीहरू समेत परेको गुनासो दूतावासमा आएको छ ।
दूतावासले ठगी गर्ने समूहमा नेपाली मूलका व्यक्तिहरू पनि संलग्न रहेको र चिनेजानेका माध्यमबाट तेस्रो मुलुकका व्यक्तिसँग सम्पर्क गराई ठगी हुने गरेको जनाएको छ । यस्ता समूहले फरक नाम प्रयोग गर्ने, सम्पर्क नम्बर परिवर्तन गर्ने, ठेगाना नखुलाउने र रकम लिएपछि सम्पर्कविहीन हुने गरेको उल्लेख छ ।
विज्ञप्तिमा नेपाल वा बेलायतको बैंक प्रयोग नगरी अन्य माध्यमबाट रकम असुल गर्ने प्रवृत्ति देखिएको पनि दूतावासले जनाएको छ ।
दूतावासले कामको स्पोन्सरसिप वा वर्क भिसा उपलब्ध गराइदिने नाममा हुने ठगीबाट बच्न सबैलाई सावधान रहन आग्रह गरेको छ । समस्या परेमा नेपालका अनुसन्धान निकाय, बेलायतको स्थानीय प्रहरी तथा नेसनल एन्टी फ्रड नेटवर्क (एक्सन फ्रड) यूकेमा उजुरी गर्न अनुरोध गरिएको छ ।
ठगीमा परेका वा थप जानकारी चाहिने व्यक्तिले मोबाइल नम्बर +४४–७४०४९३९२७४ मा सम्पर्क गर्न सक्ने दूतावासले जनाएको छ ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
