२४ पुष २०८२, बिहिवार
संयुक्त अरब इमिरेट्स (यूएई) मा वैदेशिक रोजगारीका लागि जाने नेपाली श्रमिकहरूबाट प्रहरी रिपोर्ट प्रमाणीकरण नाममा प्रतिव्यक्ति करिब १४,२०० रूपैयाँ अतिरिक्त शुल्क लिइंदै आएको पाइएको छ। यसबारे वैदेशिक रोजगार व्यवसायी संघले श्रम मन्त्रालय र परराष्ट्र मन्त्रालयलाई ज्ञापनपत्र बुझाइसकेको भए पनि अहिलेसम्म ठोस समाधान भने आएन।
जेठअघि भएको जेनजी आन्दोलन र त्यसपछि लागू भएका धेरै कडाइपूर्ण भिसा नियमका कारण यूएईले प्रहरी रिपोर्ट प्रमाणीकरणका लागि अतिरिक्त प्रक्रिया अपनाएको पाइएको हो। अब यही प्रक्रियालाई आधार बनाइ यूएईले पूर्वमा सरकारबाट प्रमाणीकरण भई आएको प्रहरी रिपोर्टलाई फेरि आफ्नै तहमा प्रमाणीकरण गराउन भन्दै शुल्क लिइरहेको तथा त्यो रकम नेपाली कामदारले तिरिरहेको व्यवसायीहरूले बताएका छन्।
नेपाल स्थित यूएई दूतावासले यस विषयलाई सम्बोधन गर्दै आफ्नो सरकारसँग शुल्क हटाउन आग्रह गरेको परराष्ट्र मन्त्रालयले जनाएको छ। तर यूएई उच्च अधिकारीबाट अहिलेसम्म कुनै स्पष्ट जवाफ प्राप्त भएको छैन। वैदेशिक रोजगारी व्यवसायीहरूले यो शुल्कले नेपाली कामदारमा आर्थिक भार थपेको र रोजगार प्रक्रियालाई असर पारेको बताइरहेका छन्।
अतिरिक्त शुल्क मुद्दाबारे श्रम, रोजगार तथा सामाजिक सुरक्षा मन्त्रालयबाट समेत परराष्ट्र मन्त्रालयमा पत्राचार गरिएको र कूटनीतिक पहल मार्फत मुक्त गर्न प्रयास भइरहेकाको जानकारी मन्त्रालयका प्रवक्ताले दिएका छन्। यूएईमा दैनिक धेरै नेपालीले रोजगारीको लागि आवेदन दिएका कारण यस समस्या समयमै समाधान हुनु आवश्यक रहेको पनि व्यवसायीहरूले औँल्याएका छन्।
सुदिप पौडेल
प्रतिक्रिया
सम्बन्धित खवर
