सरकारले चालु आर्थिक वर्ष २०८२/८३ को सात महिनामा छ खर्ब ६९ अर्ब ३२ करोड ९४ लाख रुपियाँ राजस्व सङ्कलन गरेको छ। अर्थ मन्त्रालयले शुक्रबार सार्वजनिक गरेको तथ्याङ्क अनुसार माघ मसान्तसम्म उक्त राजस्व सङ्कलन भएको हो।
यो राजस्व सङ्कलन गत वर्षको सोही अवधिको तुलनामा ३.४५ प्रतिशतले बढी हो। गत आर्थिक वर्षको माघ मसान्तसम्म छ खर्ब ४२ अर्ब ४५ लाख ३९ हजार रुपियाँ राजस्व सङ्कलन भएको थियो।
मन्त्रालयले माघ मसान्तसम्म कुल आठ खर्ब १३ अर्ब ६३ करोड १२ लाख रुपियाँ राजस्व सङ्कलन गर्ने लक्ष्य लिएको थियो। सात महिनाको अन्त्यसम्म लक्ष्यको तुलनामा ८१.४३ प्रतिशत मात्र प्रगति हासिल भएको छ।
सरकारले चालु आर्थिक वर्षका लागि १४ खर्ब ८० अर्ब रुपियाँ कुल राजस्व सङ्कलन गर्ने लक्ष्य राखेको छ। माघसम्म सङ्कलन भएको राजस्व वार्षिक लक्ष्यको ४४.९३ प्रतिशत हो।
भन्सार महसुलतर्फ एक खर्ब ७० अर्ब ५० करोड रुपियाँ सङ्कलन गर्ने लक्ष्य रहेकामा एक खर्ब ३५ अर्ब ३२ करोड रुपियाँ मात्र सङ्कलन भएको छ, जुन लक्ष्यको ७९.३७ प्रतिशत हो।
मूल्य अभिवृद्धि कर (भ्याट) तर्फ माघसम्म दुई खर्ब १७ अर्ब २१ करोड रुपियाँ सङ्कलन गर्ने लक्ष्य राखिएकामा एक खर्ब ९६ अर्ब ४४ करोड १७ लाख रुपियाँ सङ्कलन भएको छ। गत वर्ष सोही अवधिमा एक खर्ब ८२ अर्ब ६० करोड रुपियाँ सङ्कलन भएको थियो। भ्याट अन्तर्गत उत्पादन, बिक्री र सेवामा ७.८० प्रतिशत र पैठारीतर्फ ७.४२ प्रतिशतले वृद्धि भएको मन्त्रालयले जनाएको छ।
माघसम्म एक खर्ब १५ अर्ब ९८ करोड ७७ लाख रुपियाँ अन्तःशुल्क सङ्कलन गर्ने लक्ष्य रहेकामा एक खर्ब पाँच अर्ब ४३ करोड रुपियाँ सङ्कलन भएको छ। गत वर्षको माघ मसान्तसम्म ९५ अर्ब नौ करोड रुपियाँ सङ्कलन भएकोमा यस वर्ष १०.८८ प्रतिशतले वृद्धि भएको छ। आन्तरिक उत्पादनतर्फको अन्तःशुल्कमा १०.०५ प्रतिशत र पैठारीतर्फ १३.१४ प्रतिशतले वृद्धि भएको मन्त्रालयले जनाएको छ।
आयकर र अन्य राजस्व (गैरकर) मा भने गिरावट देखिएको छ। आयकरतर्फ गत वर्ष माघ मसान्तसम्म एक खर्ब ५९ अर्ब ९६ करोड रुपियाँ सङ्कलन भएकामा ०.८१ प्रतिशतले घटेर एक खर्ब ५४ अर्ब ६६ करोड रुपियाँ सङ्कलन भएको छ। माघ मसान्तसम्म आयकरको लक्ष्य दुई खर्ब २० अर्ब सात करोड ५४ लाख रुपियाँ थियो।
विभागीय रूपमा हेर्दा भन्सार विभागले माघ मसान्तसम्म दुई खर्ब ७८ अर्ब ४२ करोड रुपियाँ राजस्व सङ्कलन गरेको छ, जुन गत वर्षको तुलनामा ८.०४ प्रतिशतले बढी हो। यस अवधिमा भन्सार विभागलाई तीन खर्ब ३२ अर्ब ११ करोड उठाउने लक्ष्य दिइएको थियो, जसअनुसार लक्ष्यको ८३.८४ प्रतिशत सङ्कलन भएको छ।
आन्तरिक राजस्व विभागले माघ मसान्तसम्म तीन खर्ब २० अर्ब रुपियाँ सङ्कलन गरेको छ। यो गत आर्थिक वर्षको तुलनामा ४.२१ प्रतिशतले बढी हो। विभागले यस अवधिमा तीन खर्ब ९४ अर्ब १२ करोड रुपियाँ उठाउने लक्ष्य राखेको थियो। सङ्कलन भएको रकम लक्ष्यको ८१.३६ प्रतिशत हो।
