ट्राभल एजेन्सीको नाममा सर्वसाधारणलाई ठगी गरेको आरोपमा प्रहरीले ६ भारतीय र एक नेपाली नागरिकलाई पक्राउ गरेको छ।

प्रहरीका अनुसार ‘सीर्टल होलिडेज’ नामक ट्राभल एजेन्सीमार्फत युरोप, एसिया, अफ्रिका लगायत १७५ देशमा भ्रमणका लागि लट्री परेको भन्दै झुक्याएर ३२८ जना नेपालीबाट करोडौँ रुपैयाँ ठगी गरिएको हो।

उक्त कार्यमा संलग्न ७ जनालाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको हो। पक्राउ पर्नेमा सप्तरीको कञ्चनरूप घर भई भक्तपुरको मध्यपुर ठिमी बस्दै आएका २६ वर्षीय विवेक रेग्मी रहेका छन्।

प्रहरीका सूचना अधिकारी एसपी मनोहर प्रसाद भट्टका अनुसार रेग्मीको नाममा कम्पनी दर्ता गरी ३२८ जनाबाट २ करोड ७२ लाख ६५ हजार ५७४ रुपैयाँ ठगी गरिएको छ।

पक्राउ पर्ने अन्य ६ जना भारतीय नागरिक रहेका छन्। उनीहरू भारतको हैदरावाद घर भई ललितपुरको महालक्ष्मी नगरपालिका–२ बालकुमारी क्षेत्रमा बस्दै आएका थिए।

प्रहरीले उनीहरूबाट करिब सात लाख रुपैयाँ नगद, कम्प्युटर, विभिन्न कागजात तथा छापसमेत बरामद गरेको जनाएको छ।

अनुसन्धानका क्रममा रेग्मीको नाममा गएको पुसमा कम्पनी दर्ता गरी कार्यालय स्थापना गरिएको खुलेको छ। कम्पनी सञ्चालनका लागि करिब ३० जना नेपाली कर्मचारी राखिएको थियो।

कर्मचारीलाई कम्पनीको मुख्य कार्यालय भारतको हैदरावादमा रहेको जानकारी दिइएको थियो। ठगीका लागि भाटभटेनी, लविम मल, सिभिल मललगायत स्थानमा स्टल राखी फारम भराउने गरिएको थियो।

फारम भर्ने सबैलाई लट्री परेको भन्दै फोन गरी कार्यालयमा बोलाइन्थ्यो। त्यसपछि होलिडे प्याकेजको अफर भन्दै सोही दिन अन्तिम मिति रहेको बहाना बनाएर कम्पनीको खातामा रकम जम्मा गर्न लगाइन्थ्यो।

रकम बुझाइसकेपछि भने भ्रमण नगराउने र फिर्ता माग्दा विभिन्न बहाना बनाएर नदिने गरिएको खुलेको छ।

प्रहरीका अनुसार घटनाबारे थप अनुसन्धान भइरहेको छ।