सम्पत्ति शुद्धीकरण सम्बन्धी मुद्दामा हिरासतमा रहेका व्यवसायी दीपक भट्ट र सुलभ अग्रवाललाई थप सात दिन थुनामा राखेर अनुसन्धान गर्न अदालतले अनुमति दिएको छ।
काठमाडौं जिल्ला अदालतका न्यायाधीश तिलकबहादुर कार्कीको इजलासले बुधबार दुवैजनाको म्याद थप गर्ने आदेश दिएको हो।
अदालतमा अनुसन्धान पक्षले प्रस्तुत गरेको विवरणअनुसार अनुसन्धान कार्य अन्तिम चरणमा पुगेको भए पनि बिमा ऐन र धितोपत्र ऐन अन्तर्गतका सम्बन्धित कसुरमा थप अनुसन्धान र राय प्रतिवेदन तयार गर्न समय आवश्यक रहेको उल्लेख गरिएको थियो। सोही आधारमा सम्पत्ति शुद्धीकरण निवारण ऐन, २०६४ अनुसार सात दिन म्याद थप गरिएको अदालतले जनाएको छ।
अदालतको आदेशअनुसार अब दुवै अभियुक्तलाई मिति २०८३ वैशाख ९ गतेदेखि लागू हुने गरी थप सात दिन हिरासतमा राखेर अनुसन्धान गरिनेछ।
उनीहरूको पक्षबाट वरिष्ठ अधिवक्ताहरू कृष्णप्रसाद सापकोटा, सविता भण्डारी बराल, लभकुमार मैनाली, सुरेन्द्रकुमार महतो तथा अधिवक्ताहरू रमणकुमार कर्ण, समिरकुमार शर्मा र भावेश गौतमले बहस गरेका थिए।
अदालतमा अनुसन्धान अधिकारीले बाँकी अनुसन्धान कार्य पूरा गरी राय प्रतिवेदन तयार गरेर अभियोगपत्र दायर गर्ने तयारी भइरहेको जानकारी समेत दिएका छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
