। देशका सातवटै प्रदेशमा आज मेघगर्जन र चट्याङसहित वर्षाको सम्भावना रहेको छ।

पश्चिमी तथा स्थानीय वायुको प्रभावसँगै नेपाल नजिक रहेको न्यूनचापीय क्षेत्रका कारण मौसम बदली भएको जल तथा मौसम विज्ञान विभागले जनाएको छ।

विभागका अनुसार दिउँसो कोसी, वाग्मती र गण्डकी प्रदेशलगायत देशका हिमाली तथा पहाडी भूभागमा सामान्यदेखि आंशिक बदली रहनेछ। तराई क्षेत्रमा भने आंशिक बदलीको अवस्था रहने बताइएको छ।

कोसी, वाग्मती र गण्डकी प्रदेशका केही स्थानमा तथा अन्य हिमाली र पहाडी भूभागका थोरै स्थानमा मेघगर्जन, चट्याङसहित मध्यम वर्षा तथा हिमपातको सम्भावना रहेको विभागले जनाएको छ।

यस्तै, तराईका केही स्थानमा पनि मेघगर्जन र चट्याङसहित हल्कादेखि मध्यम वर्षा हुन सक्ने अनुमान गरिएको छ।

रातिको समयमा पनि कोसी, मधेस, वाग्मती र गण्डकी प्रदेशका हिमाली तथा पहाडी क्षेत्रमा सामान्य बदली रहने विभागको पूर्वानुमान छ। बाँकी पहाडी र तराई क्षेत्रमा आंशिक बदली रहने बताइएको छ।

विभागका अनुसार कोसी, मधेस, वाग्मती र गण्डकी प्रदेशका हिमाली तथा पहाडी भूभागका थोरै स्थानमा तथा कर्णाली र सुदूरपश्चिम प्रदेशका हिमाली क्षेत्रमा एक–दुई स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ।