नेकपा (एमाले)का उपाध्यक्ष तथा पूर्वअर्थमन्त्री विष्णुप्रसाद पौडेललाई थप तीन दिन हिरासतमा राख्न विशेष अदालतले अनुमति दिएको छ।

सोमबार विशेष अदालत, काठमाडौंले सम्पत्ति शुद्धीकरणसम्बन्धी अनुसन्धानका लागि पौडेलको हिरासत अवधि थप तीन दिन बढाउने आदेश दिएको हो।

यसअघि अदालतले उनलाई सात दिन हिरासतमा राखेर अनुसन्धान गर्न अनुमति दिएको थियो। सोमबार सम्पत्ति शुद्धीकरण अनुसन्धान विभागले पुनः म्याद थपका लागि अदालतमा उपस्थित गराएपछि अदालतले थप तीन दिनको अनुमति दिएको हो।

विशेष अदालतका न्यायाधीशहरू नारायणप्रसाद पौडेल, हेमन्त रावल र उमेश कोइरालाको इजलासले म्याद थप गर्ने आदेश दिएको हो।

सम्पत्ति शुद्धीकरण अनुसन्धान विभागले पौडेललाई असार ८ गते सुर्खेतबाट पक्राउ गरेको थियो। उनीविरुद्ध सम्पत्ति शुद्धीकरणसम्बन्धी कसुरमा विभागले अनुसन्धान अघि बढाइरहेको छ।