श्रम संस्कृति पार्टीका अध्यक्ष हर्क साम्पाङ राईले आगामी निर्वाचनपछि देशको शासन किसान, गोठाला र खेतालाको हातमा पुग्ने दाबी गरेका छन्।
शनिबार खोटाङको दिक्तेल बजारमा आयोजित आमसभालाई सम्बोधन गर्दै उनले श्रम संस्कृति पार्टीप्रति जनताको विश्वास बढ्दै गएको उल्लेख गर्दै, त्यसको प्रतिफलस्वरूप सरकारको नेतृत्व आफूहरूले गर्ने विश्वास व्यक्त गरे।
धरान उपमहानगरपालिकाका नगर प्रमुखसमेत रहेका साम्पाङले स्पष्ट सोच, श्रम र व्यवहारिक योजनाबिना देशको विकास सम्भव नहुने बताए। आफूहरू नाराभन्दा काम र खाकासहित राजनीतिमा उत्रिएको उनको भनाइ थियो।
उनले पुराना राजनीतिक दलहरूले एउटै समस्या समाधान गर्ने आश्वासन दिएर पटक–पटक भोट मागे पनि जनताका समस्या ज्यूँका त्यूँ रहेको टिप्पणी गरे। एउटै योजनामा बारम्बार बजेट हाल्दा पनि काम नहुने अवस्था देखिएको भन्दै अब सक्षम र जिम्मेवार नेतृत्व रोज्नुपर्ने उनले जोड दिए।
आगामी फागुन २१ गते हुने प्रतिनिधिसभा निर्वाचनलाई परिवर्तनको अवसरको रूपमा चित्रण गर्दै साम्पाङले श्रम गर्ने वर्गलाई अघि बढाउने राजनीतिक शक्तिमा एकजुट हुन नागरिकलाई आह्वान गरे।
उनका अनुसार अब देशलाई अगाडि बढाउने जिम्मा कुरा गर्ने होइन, काम गर्ने हातहरूलाई दिनुपर्ने समय आएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
