काठमाडौँका दुई छुट्टाछुट्टै स्थानमा रोकिराखेका सवारी साधनमा आगजनी भएको छ। गएराति महाराजगन्ज र नैकापमा अज्ञात समूहले गाडीमा आगजनी गरेका हुन्।
जिल्ला प्रहरी परिसर काठमाडौँका एसपी पवन भट्टराईका अनुसार नैकापस्थित सिप्रदी ट्रेडिङको कार्यालय नजिकै बा २८ च ३६ नम्बरको टोयोटा कारमा आगजनी भएको हो। त्यस्तै महाराजगन्जस्थित राजधानी पेट्रोल पम्प नजिकै बा ७ च १४०१ नम्बरको मारुती भ्यानमा पनि आगो लगाइएको छ।
प्रहरीका अनुसार दुवै घटनास्थलबाट मेडिकल व्यवसायी दुर्गा प्रसाईं नेतृत्वको समूहको पर्चा फेला परेको छ। फागुन २१ गते हुने प्रतिनिधिसभा सदस्यको निर्वाचन बिथोल्ने उद्देश्यले सक्रिय समूहले आगजनी गरेको हुनसक्ने प्रारम्भिक अनुमान गरिएको छ।
आगजनीबाट दुवै सवारी साधनमा क्षति पुगेको छ। घटनामा संलग्न व्यक्तिको खोजीका लागि प्रहरीले अनुसन्धान सुरु गरेको छ। काठमाडौँ प्रहरीले सीसीटीभी फुटेजको अध्ययन भइरहेको जनाएको छ।
