नेपाली कांग्रेसको केन्द्रीय कार्यसमितिको बिहीबार सानेपामा बसेको बैठकमा अधिकांश सदस्यहरूले नियमित समयमै महाधिवेशनमा जानुपर्नेमा जोड दिएका छन्। उनीहरूका अनुसार आसन्न निर्वाचनअघि महाधिवेशन सम्भव छैन।
कार्यवाहक सभापति पूर्णबहादुर खड्काको अध्यक्षतामा बसेको बैठकमा करिब १५ जना केन्द्रीय सदस्यहरूले आफ्ना धारणा राखे। बैठकमा सहभागी नेता मानबहादुर विश्वकर्मा, कृष्णचन्द्र नेपाली पोखरेल, टेकप्रसाद गुरुङ, रमा कोइराला (पौडेल), रंगमती शाहीलगायतले पार्टीले अहिले निर्वाचन तयारीमा ध्यान दिनुपर्ने मत राखे।
बैठकमा वक्ताहरूले संगठनलाई बलियो बनाउन आन्तरिक एकता र स्पष्ट रोडम्याप आवश्यक रहेको पनि औंल्याए। उनीहरूले निर्वाचन नजिकिएकाले महाधिवेशनको एजेन्डा अहिले अघि सार्दा संगठनमा भ्रम सिर्जना हुन सक्ने बताएका छन्।
बैठकमा आमन्त्रित प्रदेश सभापति इन्द्रबहादुर बानियाँ र अमरसिंह पुनले समेत अहिलेको परिस्थितिमा महाधिवेशन भन्दा निर्वाचन तयारी प्राथमिकता हुनुपर्ने तर्क राखे।
कांग्रेस प्रवक्ता डा. प्रकाशशरण महतका अनुसार बिहीबारको बैठकमा विस्तृत छलफलपछि निर्णय स्थगित गरिएको छ र पुनः शुक्रबार दिउँसो १ बजे बैठक बस्ने तय भएको छ।
पार्टी सभापति शेरबहादुर देउवा स्वास्थ्य कारणले अनुपस्थित छन्। उनले केही दिनअघि उपसभापति पूर्णबहादुर खड्कालाई कार्यवाहक सभापतिको जिम्मेवारी सुम्पेका थिए।
बैठकले आगामी निर्वाचन रणनीति, गठबन्धन नीति र संगठन सुदृढीकरणका विषयमा केन्द्रित छलफल जारी राख्ने बताइएको छ।
