लगातार वर्षापछि मुस्ताङको प्रमुख जोमसोम–कागबेनी सडकखण्ड भासिएर पूर्ण रूपमा अवरुद्ध भएको छ। आज बिहानैदेखि पिच रोड भत्किएपछि सवारीसाधन सञ्चालन ठप्प बनेको हो।
जिल्ला प्रहरी कार्यालय मुस्ताङका अनुसार जोमसोमदेखि कागबेनी जाने बाटोमा भासिएको सडकसँगै माथिबाट लेदो र पहिरो समेत खसेका कारण जोखिम अझ बढेको छ। प्रहरी टोलीले स्थलमा पुगेर निरीक्षण गरेको र पहिरो रोकिएपछि मात्र सडक मर्मत सुरु गर्न सकिने जनाएको छ।
सडक अवरुद्ध भएपछि कागबेनी, मुक्तिनाथ र अपर मुस्ताङतर्फका सबै यात्रा हालका लागि रोकिएका छन्। स्थानीय प्रशासनले यात्रुहरूलाई जोमसोममै रोक्न र आवश्यक नपरेसम्म उक्त मार्ग प्रयोग नगर्न आग्रह गरेको छ।
स्थानीय बासिन्दाका अनुसार पछिल्ला तीन दिनदेखि भएको अविरल वर्षाले सडकका विभिन्न भागमा चिरा परेको थियो। आज बिहान ठूला मात्रामा सडक भासिँदा यातायात पूर्ण रूपमा रोकिएको हो।
प्रहरीले मौसम सामान्य भएपछि सडक सुचारु गर्न सशस्त्र प्रहरी, सडक डिभिजन र स्थानीयवासीको सहयोगमा पुनर्निर्माण कार्य सुरु गर्ने तयारी भइरहेको जनाएको छ।
