नेकपा एमालेको संसदीय दलको नेतामा उपाध्यक्ष रामबहादुर थापा ‘बादल’ निर्विरोध चयन भएका छन्। पार्टी कार्यालय च्यासलमा बसेको संसदीय दलको बैठकले बादललाई दलको नेता चयन गरेको निर्वाचन समितिका संयोजक निरज आचार्यले जानकारी दिएका छन्। बादल समानुपातिकतर्फबाट निर्वाचित सांसद हुन्। दलको नेतामा सुहाङ नेम्वाङले पनि दाबी गरेका थिए, तर अन्तिम समयमा उनले आफ्नो दाबी फिर्ता लिएका थिए। यसैबीच, युवालाई संसदीय दलको जिम्मेवारी नदिएको भन्दै एमालेले सुहाङलाई खाली हात राखेको टिप्पणी पनि भएको छ। एमालेले प्रत्यक्षतर्फ ९ र समानुपातिकतर्फ १६ सिट जित्दै प्रतिनिधि सभामा तेस्रो ठूलो दलको स्थान बनाएको छ।